Fotos folgen

Mail from jonasgringo / 21.7.2008 - 21.35 h

So, da bini wider mau um churz Bscheid ds gäh.
Mir geits soso lala.
Irgendwiä vermissi d Schwiz doch meh ausi dänkt ha. I dä letschtä Täg het säch hiä usägsteut das es dä meistä hiä nur um ds Gäud geit und überhoupt nid um Fründschaftä oder so öppis ähnlechs. Mir wärde zimlech usgnoh was nid aui wei wahr ha, aber mirä Meinig nach isches so.
Zum Glück hei ig und der Mattia no paar Lüt gfungä wo mer chöi vertrouä und its sy mer haut fasch immer
mit denä ungerwägs. Der Nachbar vo üs isch Amerikaner und heisst T.C. Är isch einä vo denä Lüt wo mer vertrouä u dank ihm chöi mer ab und zuä ä Fium oder so öpis luegä. Er isch näbst üs der einzig Wyss wo mer bishär hiä gseh hei. Öpper witers wo mer vertrouä heisst Izzy. Ihn hani im letschtä Mail ja scho erwähnt.
Dank ihm chani hüt ou ändlech wider mau its Internet. I würd öich gärn aunä seperat zrügg schribä,
aber da i hüt ersch zum zwöitä mau Internet ha, isch das leider nid müglech. Mir hei ou meistens kei Strom u läbe so zimlech uf Sparflamme. Fotos chani leider no keini schickä u d Frage chani leider nur i däm Massämail beantworte. Maches darum de no per SMS.

Positiv in Nigeria isch sicher das schöne Land und ds Yoga macht ou Spass und tuet mer guet. Am Zischtig bini fasch ohnmächtig wordä wüu ei Üebig nümme ha chönnä kontrollierä. 'Achagary' heisst diä Üebig gloubs. Aber es het rächt gflashed =) Glichzytig isches aber ou sehr pinlech gsy. Woni wider bi zuä mer cho, hei mi aui chli komisch agluegt....eieiei. Zum Glück isch ds glichä am nächste Tag ou am Wale passiert.
Der Wale isch ou einä vo üserä Yogagruppä. Während erä Üebig im sitzä ischer plötzlech hingertsy gheit.Da würkä anschinend doch rächtig Energiä ufä Körper wasi ja zersch nid so rächt gloubt ha.

So, d Zyt wird scho wider knapp und scho baud hets wider kei Strom meh hiä. Mues auso stressä. Merci nomau für aui Mails. Ha mi sehr über jedäs gfreut.
 
@ MA. Du darfsch ds Mail gärn verwände
@ Tana. Schribä der de no wenn per SMS
@ Salomé. Vermissä di sehr und i fröiä mi über jedäs Mail vo dir
@ Pa. Ha zersch a di fautschi Mailadrässe vo dir gschribä. Hoffe bechunsch ds Mail its
@ aui angerä. Aues guetä und bis gly wider einisch
 
Sorry dasi so churz abungä by, aber es geit leider nid angersch.
Fröiä mi scho sehr öich wider ds gseh. Bis baud!
Lg, Jonas =)