Fotos folgen

Mail from jonasgringo / 26.7.2008 - 17.20 h

So, hüt wahrschinlech zum letschtä mau News us Nigeria.
Scho baud sy mer ja wider zrüg mit viunä fotos und verschidnä idrück. Fazit vo denä feriä faut mer eher schwär. Einersyts hani es paar wenigi Mönschä kennäglert wo mer sehr a ds Härz gwachsä sy. Angerersyts hei viu oftmaus scho ds $-Zeichä i dä Ougä wenn sy mit mer redä u das offensivä 'hesch mer das oder das' hani gar nid gärn. Darum hanis für mi so usgmacht, dasi entweder Gäud a dä Behindertä oder würklech Bedürftigä gäh ha oder de äbe denä öpis gschänkt ha wo mi nid ständig aghouä hei.
Diä einti wo für üs zuäständig isch gsy während üsem Ufenthaut het üs bi jederä Glägeheit abzocket. Je länger mer hiä sy desto besser merkä mers. Langsam hei ou diä dummä europäer d prisä im griff...hehehe.

Negativs chönnti leider no viu ds viu ufzeuä, aber i mache its mau ä Bogä drum u chumä zum Positivä. Öpper woni ganz sycher wirdä vermissä isch der Izzy. Genau, das isch dä typ woni scho paar mau erwähnt ha. Am Mittwuch het er für üs ä chlini Überraschigs Party organisiert.
Er het öper zum fiumä la cho u no ä Kolleg vo ihm organisiert wo äxtra vo Benin nach Okada isch cho (mind. 1h outofahrä) Sy Kolleg het üs när es Lied vorgsungä um üs ds zeigä das sy üs sehr gärn hei. Sehr spezieu u ds wirdi sicher niä meh vergässe. Bi sogar dä Träne nach gsy, aber pssst! ;)

Wyter wirdi sicher der T.C vermissä. Das isch ä Amerikaner wo scho syt 4 Jahr ds Nigeria isch u üs viu het chönnä häufä. Vorauem für d Fiumäbe sy der Mattia u ig ihm sicher no lang dankbar. So ohni Strom u Liecht wirds doch schnäu mau sehr längwilig. U wenns scho am 7ni dunku isch, denn....chöit der näch ja säuber vorsteuä.
 
Vor paar Tag sy mer uf Benin gfahrä und uf däm wäg hani es Geissli gseh wo chli üsy Situation widergspieglet het. Das Geissli isch wyss gsy und rund u das umä sy vilech öppä 10 witeri schwarzi Geissli gsy. Ds wyssä isch ghummplet u immer dä schwarzä hingedry gsy. Es het aber nid ufgäh u versuecht der Aschluss ds bhautä... 
Eventuell chani üsi Situation a däm Bispiu chli widergäh.

Whatever, i fröiä mi sehr dasi rycher a Erfahrigä bi u scho baud wider zrüg i der Schwiz bi. Diä Schwiz wo haut oftmaus doch nid so leid isch wiä mä aubä dänkt wenn mä wider Fernweh het.
Bis baud =)
Liebi Grüess,
Jonas